Wednesday, April 23, 2008

لو ليا حق ..هنروح انا وانت م بعضنا فين .. للمتزوجين فقط



لابد ان نتفق مبدئيا .. ع انه لن تدوم حياه زوجيه

بدون مشاحنات .. او مايدعو للازعاج

شأنها شأن اى علاقه اخرى بين طرفين

اذن .. نأسف للازعاج ...

سيدتى اعلمى جيدا .. ادم لا يطيق صوتا يعلو صوته

سيدى اعلم جيدا .. حواء جرح لكرامتها ان تسمع صوتك اعلى م معدلاته

فتجنبوااااااااااااااااااااااااااا الصوت العالى

معا .. للخناق باتيكيت والاعتذار ايضا باتكيت ..

نتخانق ازاى بأتكيت ؟؟ وهو ف خناق اصلا ينفع يكون متأكتت ..

ايوووون ...

اولا واخيرا .. مشاكل ومنغصات ومزعجات ومكدرات حياتكم الزوجيه

تظل دائما وابدا داخل مسكن الزوجيه ولا يطلع عليها سوى ابطالها فقط

ليس داعى ان تعرف ام محمد اللى ف الدور الخامس بخناقة يوم السبت

ولا انك تتصلى بماما بعد كل خناقه ..

متفقين .. نقرى الفاتحه .. ع البركه ..

لكل خطيبين ع وشك اتمام زواجهم ..

انتهى الفرح ... افتتحتوا قصر الزوجيه .. ومعاها هتفتحوا كشكول السعاده الزوجيه

كشكول .. وريقاته هتشهد ع لحظات ضعفكم وقوتكم ..

اول صفحه .. هيكون فيها صورة ليكم بتعتزوا بيها جدا


ومش شرط تكون صورة جوازكم

مش لازم كل متفتحيه تفتكرى الكوافير اللى بوظلك شعرك ..


ولا الفستان اللى اتقطع بعد ما بصم عليه العريس بخوفيه ..


وانتو داخلين الاستوديو

وتانى صفحه .. هتتقسم نصين ... مش فوق وتحت

لا نصين يمين وشمال .. (( يعنى انتى وجوزك ماشيين جنب بعض ))

مفيش حد ليه الاولويه ع حد .. انتو الاتنين ف مركب واحد

هتكتبى حضرتك ف جنب .. انتى حاسه ايه ف اللحظه دى

وانتى ايه اكتر حاجات بتحبيها ف الاستاذ ..


وايه اكتر حجات بتضايقك منه واهدافك م الجواز

وهو كذلك .. هيكتب ف الجنب الاخر

وهتعلقووه ف ضهر الباب ..

وكل ميضايقك حاجه منه .. هتروحى وتكتبى ف الكشكول

التاريخ واليوم والحاجه اللى ضايقك فيها

وهو يكتب بعدها .. ازاى صالحك .. او انك كنتى مزوداها ومكنش ليكى حق تزعلى

وتتعودوا تلقائيا تفتحوا الكشكول .. يوميا

واخر كل شهر .. تعملوا محكمه ..

هو القاضى .. وانتى المتهمه .. والعكس

وتنظروا كل القضايا وعرائض الدعوى اللى موجوده ف الكشكول

وتحكموا ع المتهم .. بالضرب ف ميدان الصاله العام بمخدات الانتريه

او بالرشق ببلالين مليانه ميه .. وغيرهاا


ودايما تجيبى الكشكول كل فتره وتقعدوا تقرروه سوووا وتضحكوااا

لما هو اضايق ان صنية البطاطس اتحرقت


ولما انتى اضايقتى انه شخط فيكى ف التلفون

وهكذا ...

ولما ربنا يرزقكم باطفال تشركيهم معاكم ف الكشكول ..

وتشركيهم كمان ف المحكمه ..

وتعلميهم الخناق باتكيت

طيب .. الاعتزار .. واللى البعض بيعتبره اسقاطه لكرامته ف نفق الهرم ..

مش عيب انك تقول انا اسف ..

بلاش تقولها ارسمها ..

بلاش ترسمها عبر عنها بعنييك حتى

هتفرح اوى ام العيال .. لما تصحى الصبح تلاقيك كاتب ع قورتها بالكحل

انا اسف ... مش هزعلك تانى ..

اينعم هتقعد تمسح فيها وتدعى عليك بس م جواها هتبقى فرحانه اووووى

اترك لخيالكم الابداع ..

تتخانقوا وتتصالحوا بكل اتكيت



د/اجدع بنوته ...

Tuesday, April 1, 2008

الخطوبه .. مصلحتك اولا


يادبلة الخطوبه .. عؤبالنا كلنا ونبنى طوبه طوبه .. ف عش حبنا

لبستها الدبله ياابو الشباب..

لبستى العمه .. الدبله .. ياام الخلول..

هاتوها وتعالووووووووووووو بقى ..

لازم تعرفى انك ف مرحله خطيره ..

وان كان الجواز عسل .. فالخطوبه هو لدغ النحل ..

ايون اللى هيجيب العسل يافالحه ..

لازم تحطى ف بالك حاجتين .. علشان هنعوزهم بعدين ::


انك اتخطبتى اه .. بس لسه متجوزتيش

انك تنزلى فورم ( فورا يعنى ) ع اقرب محل تنكر وتجيبى لبس اخينا المحقق كولومبو

ولو لقيتهم منزلين جيمس بوند كمان .. هاتى الاتنين هيدوكى عليهم دسكونت هايل

وتطلعى هتلاقى محل فيديو جنبهم .. تجيبى منهم كل الافلام اللى ف اسمها spy


تمام .. عزيزتى المخطوبه ..

ما ان يضع عزيزك الخطيب (( مش اللى بيلعب كوره )) الدبله ف صباعك

لابد وان تقلع تروس مخك معلنه ببداية المعركه .. ومنذ هذه اللحظه

تبدأى تطرطقى ودانك .. تفتحى عنيكى .. وتخلى مناخيرك ع الويتنج .. استعداد لتعقب

رائحة اى اثر للجريمه ..

الخطوبه هى مفتاح الجواز .. والباب الذهبى للسعاده

وماتش الافتتاح .. لعبتيه صح ياام الخلول .. يبقى مبروك عليكى الكاس

عتعكى فيه .. انتى حره بقى عتشيلى ع نافوخك

مبدأيا كده يابنت الناس .. خطيبك ده حسام حسن .. عبدالباسط ابراهيم .. ملاك ونزل م السما

يقولك هاتى ايدك .. ورينى جمال خطوتك .. توريله رنة جزمتك ع طول

يقولك اشوف شعرك بس طوله كام علشان اشتريلك شامبو هديه ..

اشوف رقبتك قطرها كام مللى .. علشان هجيب لمامتك خاتم ف عيد الام

تقسيله عرض اكتافه .. وتبعتيه ع اقرب نجار .. يختار نعشه كيفما يريد

..... الخطوبه دى فتره علشان تعرفى ابو الشباب فيها وصفاته وايه مشترك بينكم

وهو بيحب ايه (( علشان متبقيش تعمليه )) وهو مبيحبش ايه (( علشان تخنقيه بيه ))

وتتعرفى ع اهله وحياته وتشوفى هينفع معاكى ولا تشوفيلك ابو شباب غيره

لعب مراهقين بقى .. الفراغ العاطفى ده .. لا ياخد ع اوربيت عينه وش كده

انتو داخلين ع حياه جديده عايزين ربنا يسترها عليكم ومعاكم ...

كمان هاتى ودانك كده
.. اه ياهبله .. اقولك هاتى ودانك تدهالى

احنا قلنا ايه .. اى حد يقولك هاتى حاجه متدهالوش ابدننننن

خطيبك هيطلب منك التنازلات دى .. تحت احتمالين

احتمال انه بيختبرك .... اه مااهو كمان نزل اشترى لبس كولومبو

وجيمس بوند م نفس المحل اللى اشترتيهم منه .. هو انتى فاكره انتى بس اللى ناصحه

والاحتمال التانى .. انه فعلا عايز يمسك ايدك .. بس اول مهيمسكها وياخد غرضه منها

ويحس بخشونتها ويسيبها .. الشيطان هيبدا يوسوله بقى ..

ويقوله لا .. ما هى بتمسك اهى .. شكلها مش اول مسكه ياابو الشباب

انت هتتخم ولا ايه ..

هيقولك امسك ايدك يانسمه .. هتقليله لا يافوزى

هيقولك ماهو محمود بيمسك ايد خطيبته .. ومصطفى ومعتز

وعلاء بيمسك ايد البت حبيبته م قبل ميخطبها

ويعمل بقى انه مضايق وانه شريف ابن شداد اللى خطيبته مش واثقه فيه

وياخد جنب وعنيه شويه وهينفجر منها الساحل الشمالى

اوعى تنخى .. اوعى تتنازلى ياام الخلول ..

حتى لو هددك انه لو ممسكش ايدك هيبعتلك ورقتك

اوعى يهمك ياهبله هو اصلا لسه معندوش ورق يبعتهولك

وكمان تعالى نحسبها ..

هيمسك ايدك ف الخطوبه .. شويه وهيشوف شعرك

شويه ويبوس راس ابو الهول .. وسلسلة التنازلات هتبدا

خلاص راحت زهوة الجواز يابنتى ..

ممكن نشترى لبس جديد كل يوم ونلبسه

لكن لبس العيد بيبقى ليه طعم تانى ولبس اول يوم مدرسه ولبس اول يوم جامعه

كل حاجه بعيده وجميله ليها زهوه تانيه ..

متقليش انها حاجه بسيطه .. ايه يعنى ايدى .. ماهو لبسنى الدبله

ماشى هو مسك صوباع .. خدى بالك م بقية الصوابع

هههههههههههه لا طبعا بس بجد .. لا لا لا لا لا

لو بدا التنازل يافوزى .. مش هتعرفى تلميها م فين ولا م فين ..

سيبك انتى كمان .. انتى ايش عرفك ان ده اللى ربنا هيتمملك ع خير معاه

ميمكن لا قدر الله .. امه تستلف م ام زينهم حلل الصينى وتولع

فيضطر يطمع ف تمن الدبله.. وينتزعها م صوباعك وبلاهواده

يعنى م الاخر

ربنا لا هيكون راضى ع كده ..

الشخص نفسه هتبداى تقلى ف نظره ..

حتى لو اتجوزتوا هتفضل دى حاجه بعبع وراكى ..

هتروح زهوة الحجات دى اللى اتنازلتى عنها ف اوقات غلط

لما تيجى تعمليها ف اوقاتها الصح ..

مش كل خطوبه نهايتها جواز ..

لكن كل جواز كان اوله خطوبه ..

استنينى ياام الخلول المره الجايه

وجهزى لبس كولومبو وطقم السكاكين ابو 1500 جنيه

وميكرسكوب .. ومنظار بتلات عدسات ..

هنشششرح ..ابو الشباب

ونشوف .. يجى منه .. ولا ترجعيه وتستبدليه بكوفيه وبووت جلد احسن

ابو الشباب ,,, متقلقش خليك ع الويتنج

كلام ف سرك كده .. هفصصلك ام الخلول

بس لما اشششرحك ليها الاول

انت عارف ليدز فريزت

واجب النهارده ياام الخلول ..

اكتبى فيما لايزيد عن 200 صفحه تحت عنوان ..

الخطوبه .. مصلحتك اولا
......

Tuesday, March 18, 2008

لو .. مكنتش انت تدلعنى .. مين هيدلعنى



ادم 1 : نعععععععم .. انت بتتكلم جد ...

ادم 2 : ايه يابنى ف ايه .. عضلات بطنك سابت م كتر الضحك

ادم 1 : عندك يوم ف الشهر بتطبخ فيه للمدااااااااااااااااااااااااااااام

ادم 2 : ايه ياحيواااان .. بنطبخ سواااااااااااا .. مش لوحدى

ادم 1 : لا انت قولت بتطبخ لوحدك مترجعش ف كلاااامك ..

ده انت فضيحتك هتبقى بجلاجل


كشاف هنا لو سمحت ..

ادم ف الكادر ..

مش عيب ع الاطلاق .. انك انت كمان تتفن ف اسعاد زوجتك

مهما كانت .. اشغالك .. مهما كانت ظروف الحياه .. مهما كانت المشاكل

برده بيفضل ف وقت ... فبدل متنكد عليها فيه .. حاول تدلعها

متنساش ان حواا .. مهما كانت قويه ومهما كانت صاحبة جبروت

بيفضل جواها حواا ضعيفه محتاجه الامان محتاجه راجل تتسند لكتفه

محتاجه الحنيه .. التسامح .. قلب كبييير يسمع رغيها

مهمها تكون اهتمامتك عكس اهتمامتها ... حاول تلاقى اهتمام يجمعكم

حاول دايما تصلى بيها جماعه .. تصوموا خميس م كل شهر سوااا

.......................................

تصحى ف يوم الفجر .. بس دور ع يوم تكون هى نايمه فيه مرتاحه

مش مهدوده م شغل بيت او حاجه ولذلك يفضل يوم جمعه

تصحى وتصحيها .. وبرفق .. تدعوها تصلى معاك

وبعد متخلص صلاه وتسلم .. تدعى

يارب اللهم بارك لها وعليها .. جازيها خيرا

وقوم وامسك اديها .. وقبلهم .. وقبلها ف جبينها

واهمس وقول .. منحتينى السعاده .. منحك الله الجنه

.......................................

لما تحب تندهلها .. ياام عيالى .. ياماما لو قدام اولادكم

لو قدام حد غريب .. يازوجتى العزيزه

لو معاك لوحدك .. ياحبيبتى ..

لما تطلب منها طلب .. اسبقه ب لوسمحتى .. لو ممكن

لو اختلفتم ف موضوع او غلطت فيها .. ميجرحش كرامتك انك تقولها انا اسف

.......................................

لما تيجى تشتكيلك م جارتها اللى خنقاها

او م مديرها ف الشغل

امتص غضبها .. وحتى لو هى الغلطانه متنهرهاش

وتقولها ماانتى تستاهلى .. حاول تكلمها بسلاسه لحد ماهى تستنج انها الغلطانه

.......................................

ميمنعش انك كل يوم وانت خارج م الشغل تديها رنه ...

ولو عندك عربيه ومتيسر الحال .. تتصل بيها وتسمعها جزء م اغنيه او ميوزك رقيق

كل يوم قبل متوصل البيت ..(( وانا اعرف حد مداوم ع الفكره دى باستمرار ))

.......................................

دايما ف اى مناسبه حلوه .. تشاركها فرحتك ونجاحك

قراراتك حتى لو كنت واخدها مسبقا .. حسسها انها بتشاركك قراراتك

ناقشها ف اى حاجه .. سواء تخص شغلك او البيت .. ومتنفردش بقرار ابدا


.......................................


علم زوجتك دقة الاحساس ..

دى وريقات .. هتوزعها .. عشوائيا

مره تلاقيها ف بنطلون حضرتك وهى بتفتشه قبل متغسله .. احبك لانك دائما موجوده للاهتمام بى

مره تلاقيها ف طبقك بعد ماانت خلصت اكل وقومت تغسل ايدك

وهى بتشيل الاطباق تلاقيها ف طبقك .. احبك لانك تجيدين فن الوصول لقلب الرجل

مره وهى بتفتح علبة الميكب بتاعها .. تلاقى احبك لانك اجمل ما ف حياتى
.......................................



علم زوجتك المكافئه

..

تصل بها لقمة المغامره .. والتجديد

كل متعمل حاجه تسعدك .. تديها مكافئه

ممثله ف كارت .. م اللى موجودين ف الصوره

وهى وقت متحب .. تصرف الكوبون ههههههه

وطبعا سيبالك كوبون فاضى اهو .. ابدع انت بقى واملاه براحتك

.......................................

افكار بسيطه غير مكلفه ع الاطلاق .. ابدع انت بقى

المهم تحاول بكل الطرق تسعد زوجتك

ومتنساش الكلمه الطيبه صدقه

ده دينك سمح بأن الكذب ع الزوجه وانها اجمل مافى الوجود

وهى شكلها لا تعليق .. حلال ومسموش كدب

مفيش اقدس م رباط الزواج

اعمل كل ما ف وسعك علشان تقويه دايما

خليك الامن والامان ليها

كون اخوها وابوها وصديقها وزوجها

زى ماهى هتكون اختك وامك وصديقتك وزوجتك

..... انتظرونا البوست الجاى

..... مفاجئئئئئئئئئئئئئئئئئئئئئئئئئئئئئه

Wednesday, March 12, 2008

وايه يعنى لما اغسله رجله بالميه والملح .. لا حرام ولا عيب


.
.
حواء 2 : انتى اتجننتى تبقى ست متعلمه معاكى بكالريوس قمه وتقليلى بترقصيله

حواء 1 : وايه يعنى لما ارقصله يااختى .. وايه دخل القمه بالرقص يابعيده

ايه جنون القمه اللى خدك ع كبر ده

حواء 2 : مش نظرية جنون بس ترقصيله ايه انت كائن ليه وضعه

حواء 1 : مشلضمه .. وضع ايه ياست الكل انا يهمنى سعادة جوزى ورضا ربنا

ولا هو عيب ولا حرام انى ارقصله اومال لو عرفتى كمان انى بغسله رجله بالميه والملح

حواء 1 : سقطت مغشيا عليها الى اشعار اخر

كشاف هنا لو سمحت ..

حواء ف الكادر .. ليست اسائه لك ِ او لوضعك او لقمتك او جرحا لكرامتك .. ان تتفننى فى اسعاد زوجك

تكسبين رضا المولى عز وجل ورضا زوجك .. ياااه هدفين ولا اروع بحاجه واحده

البحث عما يرضى زوجك .. بسيط جدا ..

اعلمى سيدتى ان ادم كائن بداخله بركان م المشاعر والحنيه والحب والاحساس

يغلفها بقشره صلبه م الجمود والغضب والصرامه ..

هذا الكائن الفولاذى اشبهه بالبنتاجون الامريكى قبل ان تخترقه طائرة الحادى عشر م سبتمر

ادرسيه جيدا .. ابحثى عن نقاط ضعفه .. تلك البورتات التى يسهل منها اختراقه

اقتحمى عالمه الجامد بطائرتك الحوائيه البسيطه .. زلزلى اركان غضبه

ازيلى صرامته بابتسامه عريضه فرحه حنونه لا تفارق وجهك البشوش

ارسلى له مسج .. بعد انتهائه م العمل .. اعلم ان ماينتظرك هنا يستحق .. ان تصل اليه

ليأتى ويجدك ف شرف استقبال استاذ الرياضيات الذى طالما حدثك عنه وعن مايكنه له م محبه

ولا تنسى ان يرافقكم والده او والدك .. حتى لا نتجاوز شرعنا الكريم

----------


ارسلى له .. ورده كل يوم .. ولن تجديها صعبه .. ظبطى ساعى المكتب ب 5 جنيه كل شهر

كل يوم يدخل مكتبه ليجد ورده م مجهول .. ليكتشف بعد مده ورده مطابقه للورد الغامض

تأتيه مع طبقه المفضل ع عشاء ف ليله دافئه .. ليعلم فورا انك انتى م كنتى تراسلينه منذ شهور

----------


يدخل ليجدك ترتدين تى شيرته المفضل .. تأتين له ضاحكه قائله بهمسات ..

اشعر بداخله بدفء لم اشعر به طوال حياتى .. سيشعر بمزيد من الحماس لكونك تعتزين بمتعلقاته

----------


اجعليه يستيقظ م نومه ليجدك امام وجهه مباشرة .. بنظرات لامعه قائله ف همسات ..

يومك سعيد ياملاكى البرىء ....

----------


اجعليه يستيقظ يوما ليجدك ممسكه بماكينة الحلاقه مصممه ان تهذبى له لحيته .. واحرصى

الا تصيبيه بسوء ههههههههههه .. سيشعر بمزيد م الرضا

----------


وهذا يوم كادووو .. لاى زوجه تسعى لارضاء زوجها

اخبريه يوم الخميس ليلا انك ترغبين ف الخروج غدا لشراء بعض الاشياء

نعم ( انا م انصار عدم خروج الزوجه بدون اذن زوجها ) حتى ولو كانت لمفاجئته هو

يستيقظ صباحا ع انغام صوتك (( كنغمه لمنبه التلفون )) تكونى قد اعددتيه م فتره وتكون الساعه 9

قائله .. بحبك بلون الورد .. بحبك بجد .. وبكل ودد .. اصحى بقى ياشييييييييييييييييييييييييخ

بعيدا عن ماسيصيبه م الصرع بعد هذه الخضه ههههههه يستيقظ ليجد ورقه كبيره

معلقه ف مكان مرئى منه .. مكتوب عليها .. النهارده يومك انت وبس ...

سيشعر حتما بانك تحيكين له شىء ف الظلام .. سيحاول مرارا الاتصال بهاتفك المحمول

والذى سيكون حتما مغلق .. ليتأكد بذلك ان هناك مايحاك ف الظلام ..

ويصل عنده الفضول الى اعلى معدلاته ويدخل ف توليفة المغامره ..

اوعى تنسى تكونى محضراله الفطار وملابسه وكل شىء ..

بعدها بساعه اى العاشره ارسلى له مسج .. طلع محفظتك وشوف الورقه الحمرا

حتما مجرد ان تسقط عينه ع الحمرا سيخرج فورا محفظته ليجد فيها

ان كل الورق اللى فيها احمر .. يخرجها الواحده تلو الاخرى

واحده .. فيها بحبك

التانيه .. زعلت منك لما كشرت ف وشى م تلات ايام

التالته .. بتوحشنى كل لحظه بتكون فيها بعيد عن عينى

الرابعه .. الخامسه .. السادسه .. مفهمش حاجه

السابعه .. انت عالمى

التامنه .. فيها نقطه سودا

التاسعه .. النقطه دى انا .. وانت مش جنبى .. شايف بنكمش ازاى

العاشره .. انزل فورااا .. انا محتجالك

وبعدما حصلنا ع هذا المعدل العالى جدا م الاثاره والحماس والغموض والمغامره

تبدا .. المغامره ..

يخرج .. ليجد البواب ف انتظاره قائلا له .. المدام سابتلك الظرف ده

او لو كان عنده عربيه .. فسبيى الورقه جوا العربيه

ما تحتويه هذه الورقه .. اذهب فورااا الى العنوان الفلانى

واحرصى ع ان يكون قريب م المنزل .. ما هو القريب م المنزل

اصبرى واشترى منى ..

يذهب ليجد ف انتظاره محل للورد .. وبعد ميعرف نفسه واللذى منه ’يحمله بائع الورد

وردات ف رابطه رقيقه (( بعدد افراد اسرتكم )) .. ان كنتم اتنين او تلاته لو ف اطفال او اكتر

تكون هذه الوردات جميعها بلون واحد ماعدا واحده مميزه بلون اخر ..

حتما ها هو الان .. بدا يتعصب ويحس انه زى الاهبل

وهيبدا يتخنق .. سريعا سيتصل وف هذه المره سيجد هاتفك ف نطاق الخدمه

بمجرد مالمكالمه هتبدا لا تتركى له فرصه للكلام ..

تعالى ف العنوان الفلان الفلانى ..

سيأتى ع الفور .. ليجده

المسجد الذى اعتدتم الصلاه فيه ف رمضان ويفضل المسجد اللى كتبتم فيه كتابكم

ان كان قريبا ... تضعين يدك ع كتفه

وبنظرات حالمه .. تخطفين الوردات م يده .. تشدى م وسطهم الورده المميزه

قائله .. خروجك م بستان حياتى .. وتهزى دماغك يمينا ويسارا يعنى لا ..

وحطى الورده ف جيب قميصه وقولى ليه حرما مقدما ..

طبعا هو هيكون ف عالم اخر م البلاهه والحب .. واختفى انتى فورا

بعد انتهاء الصلاه .. وخروجه انتظريه .. واساليه .. اى مكان تتمنى ان نكون فيه الان

لو قالك .. البيت روحوا .. لو قالك بيت اهله روحى لو قالك اى مكان تانى روحى معاه

لانه حتما سيكون افضل مكان ع قلبه .. سيكون اكثر مكان يشعره براحه

فبعد الارتباك النفسى اللى حطتيه فيه .. م اثاره ومغامره الى بلاهه وخنقه الى توهان الى حب

الى صلاه وروحانيات

سيخرج كطفل صفحته بيضاء .. يبحث عن المكان الذى يشعره بالامان

اذهبى معه الى هذا المكان .. فوجودك معه ف هذا المكان المميز له

سيحفر ف ذاكرته ما حييتم .. وربنا يديله طول العمر

ويسعدكم

ع فكره اوعى تتخيلى انه مهما كان انسان عنيد او انه مش هيتقبل مزاحك ده

انه ممكن مينزلش م البيت او لو وصل لمحل الورد هياخد الورد يرميه ويقول ايه الجنان ده

صدقينى هيمشى ف المنحنى النفسى زى ماهو متخطط بالظبط

وهيجى المسجد وهو مش فاهم هو ليه لحد دلوقت مرماش الورد ده

هههههههههههههههههههههههههههههههههههههههههههههههه

وبالهنا والشفا ..

حقوق الملكيه والفكريه محفوظه ليا طبعا ...

!!.. هحقق كيانى ياابن بارم ديله


حواء : انا عايزه اشتغل بقى ياادم .. انا عايزه احقق كيان منفصل

ادم : مشردحا كيان ايه ياام كيان .. اقعدى والنبى ياحوااا ع جنب كده

حواء : حرام عليك انا قربت انسى الدراسه اللى انا درستها

ادم : دراسة ايه انتو اللى علمكم ده كان جاموسة اللى خلفوه مصروعه

وبعدين يعنى الرجاله عارفه تحقق كيانها لما انتى يااوليه هتحققى كيانك

يتك وكسه انتى ست اخرك تكنسى وتمسحى وتخلفى وتربى وانا اسعى ع اكل عيشكم

كشاف هنا لو سمحت ...

ادم ف الكادر ... اياك ان تسفهه م دورها ف الحياه .. حواء مش بقره تخلف وتربى وتكنس وتمسح

حواء كائن لها كيان مثلك .. دورها البيولوجى كدورك بيولوجيا ... تتكاثرا لاستمرار البشريه

حتى امر كان مفعولا .. ولكن ايضا لم يستثنيها ربك او شرعه م الوظيفه الاخرى الاعمار ف الارض

تكنس وتغسل وتمسح مقلناش حاجه .. ان ارادت ان تكون امراه عامله .. لها كيان منفصل

فاتركها تفعل ذلك بل وساعدها ايضا

حتى تفشل هى فتأتى لك شاكره دورك ودعمك لها وتكسب انت روجوعها مرة اخرى الى ماكنت تريده انت

وان نجحت فتأتى لك ايضا شاكره دورك ودعمك لها وتنسب جزء م هذا النجاح لك

وتفعل كل ماتستطيع لارضائك ..

وكيف لا ترضيك فانت من دعمها لتسيير ع درب النجاح

فانت ادم المحب الداعم فتجدها بدل مكانت بتكنس وتغسل وتمسح وهى قاعده ف البيت 24 ساعه

بقت بتغسل وتكنس وتمسح بررووحين وهى بس قاعده ف البيت 12 ساعه

لا تتعجب .. ليست هذه قدره غريبه سقطت عليها من السماء تستدعيك

لارسال طلب لموسوعة جينس مرفق معه صوره لزوجتك وهى تقوم باعمالها المنزليه بتلات ارواح

مطالبا اياهم بضمها لكاتيجورى العجائب البشريه

هكذا هى حواء ...

تدعمها .. بحب وبوافر تقدير

تجدها .. بقت دبل مكس باورر

باشعال ذاتى .. اضاءه ليليه

هكذا ياادم كان سيدنا وحبيبنا رسول الله

الصلاة واذكى السلام عليك يامحمد يا اشرف خلق الله

كان يوكل لامهات المؤمنين دور فى نشر الدعوه

دور لاسماء بنت ابى بكر رضى الله عنهما فى دعمهم فى الغار فى هجرة النبى وصحبه

نعم هكذا حواء

ادعمها .. بارك نجاحها .. اشعرها انه جزء م نجاحك .. كنجاحك الذى بدوره جزء م نجاحها ايضا

لا تشعرها بالغيره .. ان التقطت حواء هذا الشعور برادارها الحيوى

فصدقنى ..

هيبقى عليك وع اعدائك وهتغنى ف البحر سمكه ..!!

ادم .. حواء .. علاقات لا محدوده



..

..

قد يجد الجميع .. اقحاما منى لهذا العالم لصغر سنى

لحداثتى ف الحياه

ولكن لست ادرى .. حقا لست ادرى

هل انا ولدت ع هذه الثقه العاليه م معرفتى الثاقبه للاصناف البشريه

افهم الاشخاص م اعينهم .. احلل شخصياتهم

من اتصادف معه مره فى حياتى لا انساه

من اسمع صوته او اسمه مره فى حياتى لا انساه

على خبره جيده جدا بمعرفة اى بشر ( م ضهره ) طالما مر عليا هذا الضهر يوما

لدرجة انى واحمد الله اعرف وجوهه طلاب كليتى المصونه جميعااااا و 70% منهم اسما

مفيش مره .. (( امر ويسقط ع مسامعى احدهم يستدعى اخر باسمه الى ان يمتصه عقلى

اسرع من امتصاص قماش البفتا للكلوركس الالوان او جوهر كمفورت ...

احببت هذه القدره وهذه الميزه ع الاطلاق

اثقلتها بالبحث فى هذا العالم

النفوس البشريه ...

وسرعان ما جيت انترستد فى هذا المجال

نفسى الكون .. او قطبى الكون

سالب وموجب هذه البسيطه

انهم ادم وحواء ..

احببت علاقتهم فى كل مكان

ادم وحواء زوجان

ادم وحواء اخوه

ادم وحواء اصدقاء

ادم وحواء زملاء عمل او خلافه

تسترعانى حقا

اى علاقه تجمع بين قطبى

الدورى الكونى ..

ادم وحواء

فى العمل فى الجامعه فى النت فى الشارع

احببت ان اشارككم

هذه العلاقات وما توصلت اليه

م سر نجاح البعض منها وفشل البعض الاخر

آمله ان نسعى جميعا لانجاح علاقاتنا

بالقطب الاخر سواء كنتم نساء او رجال

اضيف لكم خبرتى المحدوده .. تضيفون لى خبراتكم اللامحدوده

راغبين ف رضى المولى عز وجل